جلست مع عائلتى نتشاور فى امر الانتخابات ودخلنا جميعا الى موقع الحكومه للانتخابات
http://www.
وطلعنا مكان اللجنه الخاص بكل واحد فينا ورقمنا فى الكشف وكل حاجه كانت ماشيه كويس وفجاة لقينا نفسنا مبلميين وكل واحد مننا بيبص للتانى وكلنا بنقول فى نفس واحد طيب حننتخب مين ؟؟؟؟؟؟؟؟؟؟؟؟؟
وسادت الغرفه لحظات من السكون وهنا انشقت على صوت حماتى انا حانتخب اى حد الا الاخوان وهنا قال اخر انا ممكن انتخب اى حد الا الاخوان واخر قال انا دول عايزين يمنعونا نمشى فى الشارع وحيمنعوا السينمات وحيخلوا الستات تتنقب وحيخلونا زى السعوديه ووجدت اجماع رهيب على الخوف من المجهول والمتمثل فى الاخوان. فقلت طيب يا جماعه ننتخب مين ؟؟؟؟؟قالوا ننتخب الكتله
قلت طيب تعرفوا حد فى الكتله
قالوا ايوه
قلت مين
قالوا دو احزاب مجتمعه منهم المصريين الاحرار (ساويرس) والتجمع والاتحاد الاشتراكى والحزب الشيوعى وحزب الحياة ومصر الحريه والجمعيه المصريه للتغيير
قلت لا انا عايز اسامى الناس اللى حتنتخبوهم
قالوا لا منعرفش
قلت ازاى ؟؟؟؟؟؟ امال حتنتخبوا الفردى ازاى ؟؟؟
هنا خيم الصمت الرهيب وفوجىء الجميع انهم لا يعلمون شيئا عن المرشحين
وانا زيهم طبعا
فاقترحت اقتراحا لماذا لا نتق الشبهات وما دمنا لا نعرف اى من المرشحين خلاص يبقى ننتخب الاخوان اهو على الاقل يبقى عارفين اى حاجه عن اللى حننتخبه انما لو رشحنا اى حد وحتى لو من الكتله فاحنا منعرفش عنه اى حاجه
ده حتى ممكن يطلع فلول واحنا مش واخدين بالنا
فلقيت الناس كانت حتاكلنى وخاصة حماتى
مستحيييييل انت باين عليك اخوانجى
ضحكت
المهم قعدنا نفكر فى حل تانى ولقينا ان الحل هو الحبل هههههههههه
كل واحد مننا عنده اكتر من 90 مرشح فردى وميعرفش حد منهم
طيب نعمل ايه؟؟؟؟
مفيش غير اننا ندخل على الانترنت ونعمل بحث عن كل هذه الاسامى اسم اسم
ونشوف مين فيهم اللى ممكن ينفعنا ولكن اكتشفنا ان كل واحد فينا له دايره مختلفه وكل واحد عنده 90 مرشح واكتر يعنى عندنا حوالى الف مرشح يا وكسه سوده
طيب نعمل ايه؟؟؟؟؟؟؟
وهنا رن موبايل مراتى وكان على الطرف الاخر صديقه لها بتسالها هو انتوا حتنتخبوا مين؟؟؟؟؟؟؟؟ فضحكت وسالتنى قلتلها مش عارف
وفى نفس الوقت وجدت صديق لى فى الخارج بيسالنى نفس السؤال على الفيس بوك
قلت له مش عارف
وهنا وجدت اننا جميعا مستسلمون نبخل على وطننا ببعض الوقت
فيجب ان يؤدى كل واحد منا واجبه اتجاه وطنه فلتدخل على الانترنت وتبحث عن السيره الذاتيه لكل الموجودين فى قائمتك ولتؤدى الواجب ناحية وطنك ولا تبخل عليه ببعض الدقائق التى من الممكن ان تكون فارقه فى تاريخ هذا الوطن
ودخلت على موقع الانتخابات ولانى من المصريين الذين يعيشون فى الخارج فادخلت رقم التسجيل الخاص بى والذى اخذته من نفس الموقع عند تسجيل اسمى فى كشوف الناخبين منذ ايام وادخلت رقمى القومى وانتظر ان تظهر الاستمارات حتى اخذها بيدى للسفاره غدا ان شاء الله وانا فرحان اننى سادلى بصوتى فى انتخابات مجلس الشعب لاول مره وخاصة فى الخارج
وفجاه وبدون مقدمات وجدت الموقع يخرج على برساله تقول
ناسف هذا الرقم غير موجود بالخدمه
اسف
قصدى هذا الرقم غير مقيد فى كشوف الناخبيين
وهنا ساد الغرفه سكون عميق
وظل هذا السكون حتى فرغت من كتابة هذه المقاله
0 comments:
Post a Comment